"Белем җәүһәрләре" бәйгесе башланырга санаулы көннәр калды

Хөрмәтле татар интернетчылары һәм татар интернеты белән кызыксынучылар!

"Белем җәүһәрләре" бәйгесе башланырга санаулы көннәр калды. 20 февраль, җомга көнне, "Белем җәүһәрләре" бәйгесе алтынчы мәртәбә гаризалар кабул итә башлый. Бу турыда карар 13 февраль көнне "Татнетны үстерү фонды"ның чираттагы җыелышында каралды.

Хәзерге вакытта бәйгенең нигезләмәсе яңартыла, үзгәртүләр һәм төзәтүләр кертелә, сайтның платформасы яңа гаризалар кабул итү өчен әзерләнә.

Хөрмәтле татнетчылар! Бәйгене камилләштерүдә өлеш кертергә теләсәгез, сез дә әлеге эштә катнаша аласыз. Фикерләрегезне, тәкъдимнәрегезне комментарий буларак калдырыгыз яисә форумда фикерегезне урнаштырыгыз. Сезнең фикерләр оештыру комитеты тарафыннан каралачак һәм игътибарга алыначак.

Бәйгенең дәрәҗәсен үстерү һәм ныгыту өчен әлеге бәйге турында барлык танышларыгызга һәм дусларыгызга сөйли аласыз. Бәйге елдан-ел яхшырыр, ныгыр һәм татар интернетын үстерүдә зур өлеш кертер, дип ышанып калабыз.

Ихтирам белән, Оештыру комитеты рәисе Раил Гатауллин

Фикерләр